د دنیا لمن

ډک دی د دنیا لمن سراسر جفا ځنې
نکړي د وفاطمع څوک د بې وفا ځنې
غم لاسونه اچوي هرچاپه ګریوان دلته
هیڅوک خلاصیدی نشي داسې په ژړا ځنې
هغه پخوانی مینه نشته په دوستانو کې
څوک دغم خواری امید نلري آشنا ځنې
چیرته څوک ایستلی شي یو نفس آرام دلته
زړه مې ډیر‌‌تورشوی دی نورددې دنیا ځنې
سراومال مې کړی داوله دخپل یار په نوم
نوربه څه څوک طمع کړي ماغوندې ګدا ځنې
هرڅه چې رسیږي بس لیکه د تقدیر ګنم
نه کومه زه ګیله طاهري بل چا ځنې
شکرالله طاهري

راځئ چې یونغمه شوٌ

راځئ چې یونغمه شوٌ یوطرزد خپل سازونو کړو

ښکلی فضاء جوړه به په یو رنګ آوازونو کړو
راځئ چې خپل ځان رنګ کړودمینې دیورنګ سره
جوړ به سمندر شو لار به ورک د دریابونو کړو
راځئ چې نور ونه غولیږوهیڅ دکوم دښمن په چال
راځئ چې په رښتیا نور تعبیر د خپل خوبونو کړو
راځئ دا نورې شپې هم د قدر په شپه واړه وو
راځئ چې نورهم ستړی ځان الله ته په سوالونوکړو
راځئ چې د نفرت او د کینې جامونه ماتې کړو
راځئ چې ځان نورمست د محبت په شرابونو کړو
راځه چې نور پریدو (طاهري )دا خواراو زار ژوند
پیدا یو نوی ځای به د آسمان  په شهابونو کړو
شکرالله طاهري

وطن ته

تا د زړه په  وینو لوې  کړم  چې ځلمی یم
اوس په غم  دې که  مړنه شم څه سړی یم
که    دوستانو   ته  دې  ګل یم   د  ګلابو
هر غلیم  ته  دې  په سترګو  کې اغزی یم
که مې دا ځل دښمن وویست ستا  له کوره 
بیا  به  وایم  په  رښتیا  چې زه زمری یم
ته خوشبو یې زما د ژوند اومرګ وطنه
زه پخپل خزان هم خوښ دې په سپرلی یم
 د  ژوندي  قومونو څنګ  ته  په  راوړلو
که  زه مړ هم شم نو تل ترتل  ژوندی یم
د دنیا  طبیبان  څنګه  به  مې  روغ کړي
طاهري هجر یې  ایشتلی  په  زړګی  یم
                          شکرالله طاهري

سحرګره

ما چې وه لیدلې آشنا غلې وه
هغه سحرګره ډیره ښکلې وه
بیګاه د څوارلسمی سپوږمې رڼا
مخامخ یې مخ ته شرمیدلې وه
ما که پیژنده دا د ازل کاتب
دا قسمت مې ځان سره تړلې وه
تا که د راتلو خبر راکړی وای
وینه مې د زړه درته شیندلې وه
هغه ډیره ښکلې پیمخه بُدری
زما د یار د حسن پوره وړې وه
ستایو بې روخي نه طاهري یاره
ټوله شپه د ځان سره ژړلې وه
شکرالله طاهري

دنیا ده ډیره ښکلی

دنیا ده ډیره ښکلی هغه چاته چې بې غم دی
دوزق ورنه جوړیږي درد او غم سره قسم دی
په هرموړکې خپل نیسي ژوند کمزورخلک په جال کې
هر دم او هر ګړی یې زنګوي د درد په ټال کې
غریب سړي ته هسې هم دا ټول دنیا تورتم دی
دنیا ده ډیره ښکلی هغه چاته چې بې غم دی
چې یار درسره نوي نو فردوس دوزق جوړیږي
ظالم وخت به بیا هم درباندې سخت اوګران تیریږي
چې یار دې وي په څنګ نو بیا قسمت دې ترقدم دی
دنیا ده ډیره ښکلی هغه چاته چې بې غم دی
مین زه په وطن یم او محبوب مې هم وطن دی
لیلا زما شرین زما همدا زما چمن دی
د هجر غم یې کله آشنا د یو غر نه کم دی
دنیا ده ډیره ښکلی هغه چاته چې بې غم دی
آشنا طاهري وایې دا ترخه کلام خواږه کړه
د غم غزلې پریده د مزې سندرې زده کړه
خودرد چې ترې جګ نه شي بې مزه هغه قلم دی
دنیا ده ډیره ښکلی هغه چاته چې بې غم دی
شکرالله طاهري

هرچیرې

هرچیرې چې وړي ظالم قسمت ورسره ځمه زه
چیرته چې راځي ساحل کشتی به پارومه زه
موج دې د غمونو که بیا راغی او بیتابه کړم
سیند به یو د اوښکو د سیلاب نه جوړومه زه
اوردمینې زړه اوځیګر دواړه زخمي کړي دي
د نوي نور زخمونو احوال بیا به در لیږمه زه
څوپورې چې رانکړی دمینې خیرات خوږ آشنا
داسې پخپل غاړه یو کچکول به ګرځومه زه
ستا په مخ بیا ښکاري راته ستورې د رڼا او بخت
یو ځل بیا ددې قسمت طالع به جنګومه زه
کله به رسیږي طاهري په کام د زړه یا رب
څو پورې په ټال د خیال آرزو به زنګومه زه
شکرالله طاهري

ژوند

کله راته خاندي کله ژاړي دغه ژوند
رنګ بدلوي هروخت داسې ښکاري دغه ژوند
کله ډیر بدرنګ شي کله جوړشي خاپیری
کله مینه کله نفرت راوړي دغه ژوند
پریده چه آزاد شمه نوربی وفا د قید ځنې 
نوربه څومره غم ګنې به شماري دغه ژوند
لاړو ځیګرخون یې کړمه نور د انتظارځنې
 څومره دزړه صبررانه غواړي دغه ژوند
ای د نامرادو کم بخت اجله چیرته یې
شپه او ورځ بس تا پسې مې ژاړي دغه ژوند
څیرې ګریوان ګرځم سرببره طاهري
دې نه به بل کوم رسوایي راوړي دغه ژوند
(شکرالله طاهري )